اغرب طرق العلاج في الماضي

تعالى نتكلم عن معضلة غريبة كده ونشوف ازاي وليه؟؟
جاهزين؟؟؟
يالا بينا ...

مبدئيًا انا اسف عاللي هتقروه في البوست ده

كلنا عارفين إن في ناس بتتبرع بالأعضاء علشان تنقذ حياة ناس تانية صح ؟
عمرك بقى سمعت بناس بتتبرع بنفسها علشان تتاكل كنوع من العلاج ؟؟!!

في سنة 2003 كاتبة اسمها " ماري روتش " عملت كتاب عن " الحاجات الغريبة اللي البشر بيعملوها على مر التاريخ "

في الكتاب ده ذكرت معلومة مريبة جدًا كان كاتبها عالم صيني اسمه " Li Shizhen " عن حاجة اسمها " Mellified man " أو " مومياء الشمع " أو " رجل العسل " زي ما هو معروف.

العالم قال إن دي طريقة كان بيتم استخدامها في " جنوب شرق اسيا " و " الحضارة الأشورية " وبعض رجال العرب زي ما وصله .

أقرا أيضاً : يوميات فني أشعة بقلم وائل عبد الرحيم

ايه الحوار ده بقى ؟
ببساطة كان في ناس على مر التاريخ بيوهبوا نفسهم لعلاج الغير، ازاي ؟ . كانوا بيضحوا بإنهم يفضلوا فترة كبيرة جدًا مبياكلوش غير عسل ، حرفيًا عسل بس !!
مفيش شرب، مفيش اي حاجة تانية في حياتهم غير اكل العسل .. لحد ما بيموتوا.

بعد الموت بيتم ضخ كم كبير من العسل في جثثهم و وضعهم في تابوت صخري مليان عسل .
التابوت بيتقفل و يفضل متخمر لحد ما الجسد يتحلل جواه .
وقتها بيتم جمع العسل المخلوط بالجثة الميته ده و بيستخدم كعلاج سواء بالدهان أو بالأكل.

كمية صغيرة جدًا كانت كافية لشفاء شخص شفاء كامل و بالتالي الجثة الواحدة كانت بتفضل سنين تستخدم والعسل كان بيتباع بأسعار مهولة في الأسواق .

اخر معلومة إن دي مش أسوأ حاجة كانت بتحصل كعلاج في الماضي .
لإن كان بيستخدم حاجات كتير جدًا من البشر للعلاج زي الدم ، البول ، الشعر .. الخ .
بس كدة