-->
≡

افضل قصائد الشاعر نبيل عبد الحميد

نقدم لكم في هذا المقال أفضل قصائد الشاعر المبدع نبيل عبد الحميد (متجددة بـ أستمرار)

1 - كان اخر باب لـ الشاعر نبيل عبد الحميد

ساب المُنشار
دق المسمار
بَص على زبُونُه
متردد
ينطق أو يسكُت
محتار ..
- أؤمُر
= شُكراً
- ترابيزة / دولاب ؟
= لا أبداً .. أنا عايز باب ..
جربت كتير أبواب لكن
ولا واحد كان نافع بيننا ..
وإن جِه مظبوط لازم برضُه
في الآخر يطلع فيه سِنّة ..
لو كنا واربنا الباب يمكن
كان يفضل م الهوا سرسوب ..
كان ممكن أتوب ..
كان ممكن يبقى المكتوب
إن إحنا نحافظ على بابنا ..
كان ممكن نتعب ونكمّل
وهنوصل
على أد تعبنا ..
سرسوب الهوا قَفَلُه وسابنا
إتنين ومابينهم باب مقفول ..
أنا يعني بقول ..
لو ينفع أجرّب باب تاني
يفتح على كل اللي ما بيننا
لو حتى هيطلع فيه سِنّة
وانا هقفل وافتح بحساب!
- كان نِفسي أساعدك صدقني
أنا آسف،
كان آخر باب ...

2 - رغم أنك ل الشاعر نبيل عبد الحميد

رغم إنك هُوّه هُوّه 
في الطبيعة والملامح ..
إلا إن الصُورة جايبة
إختلافكوا بشكل واضح ..
هو خَد دور المسامح
رغم إنه مش كريم ..
إنت شر بشكل فاضح
رغم إن إنت الحليم ..
إللي بينكوا كان قديم ..
من بداية لـ اختلاف 
إنت تِهدَى
هو يِجري 
إنت تطّمن 
يخاف ..
إنت شُفت وهو شاف
بس عينُه مش بعينك ..
إنت شُفت الموت - جِريت
هو شافُه وقالُّه فينك ؟ 
إنت أفعالك تدينك 
هو شفعالُه المحبه ..
إنت تِدِّي
هو ياخُد
إنت حبّه
هو حبّه ..
إنت قُلت وهو خَبّى
لمّا كان مفروض يقول ..
إنت تمشي
هو يركب
إنت أرنب
هو غول ..
والكلام بينكم يطُول
كلمه سين على كلمه جيم ..
كل واحد فيكوا وافق ..
يبقى نُص فـ شئ سليم ..
نُص رافض
عاش أناني
نُص تاني
مات غشيم ..
..
كُل شئ في الصوره أثبت
إن بينكوا خلاف قديم ...

3 - شبه لـ الشاعر نبيل عبد الحميد

شَبَه البني آدم، بيعيش
شَبَه الأيام
شَبَه الأحداث
بين شَبَه الدنيا وشَبَه الناس .. 
..
شَبه المُتحمّس وبيجري
ورا شَبه الحلم …
شَبه الزهقان، دخَل السينما
شاف شَبه الفيلم …
شَبَه اللي بيطلب شَبَه العلم
شبه شهادات .. 
شبه إللي بيجري عشان يقطع
شبَه المسافات .. 
..
بيعيش أوقات تشبه أوقات
وسط الأشباه .. 
شَبَه إللي وراه واللي قصاده
شَبَه إللي معاه ....

4 - من مالطة لـ الشاعر نبيل عبد الحميد

ويحكيلي، ما أصدّقهوش
وأقول بيبرر الغلطة
ويحلف ياما، ما أسمعهوش 
وبعمل فيها من مالطة
..
يقول معذور
أقول غلطان
يقول مجبور
أقول فلتان 
..
يقول طب نفترض لو كان
مكان رؤيتنا مش نفسُه 
أشوف حاجة
تشوف حاجة
كأي إتنين بيتنافسوا 
وحد هييجي على نفسُه
ويسمع حبّة للتاني ..
..
أقول سامعك
يقول أحسن،
تعالى شوية في مكاني ...
وهتعاني ... 
..
ناداني
قلت أنا هحارِب
عشان أكسب، وما أخسرنيش ...
..
تجارِب 
بابها متوارِب ...
ودُنيا معلّقة كهارِب ...
معايا عصايا ومآرِب ... 
حالفت الحظ ما حالفنيش ..
رجعت أحكي، ما صدّقنيش
يقول بتبرر الغلطة ...
وأحلفلُه، ما يسمعنيش
ويعمل فيها من مالطة ..
أقول معذور
يقول فلتان
أقول 
طب نفترض لو كان ؟

5 - سبتك حرة لـ الشاعر نبيل عبد الحميد

كانت آخر نُقطة بتسكُن 
في القطّارة 
لكن كانت قادرة تفَوّر 
في الكوباية ...

كانت آخر مرّة أشوفك
يومها بعيني 
آخر مرة الناس يشوفوكي
وانتي معايا ..

كانت آخر مرّة يوميها 
أبُص ورايا ...
كانت آخر مرّة بتمشي
وما تبُصّيش ...

كانت آخر آخر مرّة 
سِبتِك حرّة
ما رجعتيش ...

6 - كل عام لـ الشاعر نبيل عبد الحميد

كل عام وإنتم أكيد
ميّتين خايفين تقولوا ..
كلنا رجلينا أقصر
م إللي مش قادرين نِطولُه ..
البراح في الليل بطولُه
مش مكفّي الدمعتين!
يبقى فين ؟
جبتوا يعني مكان منين
يبقى ساحة للصراع؟
والتمدد
والتنهد
والتشدد
والوداع ؟
خدتوا إيه لجل الصداع؟
بس قولوا
دمعتين في الليل كفاية؟
دمعتين في الليل بطُولُه!

7 - بين الشكوك لـ الشاعر نبيل عبد الحميد

بين الشُكوك والخوف 
كل اللي آمن شاف ..
كان الطريق ضلمة
وانا كُنت لِسَّه بخاف ..
...
أنا كُنت حِمل كتاف
ساكن في حواريهُم ..
وسنين عجاف وهتاف
رافض يعيش بيهُم ..
أنا كانلي شئ فيهُم
ولكنُّهم ما كانوش ..
والدُنيا جَري وحوش
عالسُكنى والمسكنة ...
..
كان ف الطريق مُنحنى
وأنا كُنت راكب خيل ..
..
أنا كُنت خيل شايل
فارس مكانش نبيل ..
..
أنا كُنت صف طويل
واصل لغاية هِنا ...
..
القعده مِتوسطَنة
حواليا ناس كُنتُهم ...
ولفترة في حياتي
جرّبت أكون شكلهُم ...
شبهي
وبشبهلهم 
لكنّي بشبه مين !
...
وعرفت غلطتي فين
بالظبط من كام سنة ..
أنا كُنت كُل الناس
لكن ماكُنتش أنا ...

8 - كان فاكر لـ الشاعر نبيل عبد الحميد

كان فاكر إنه
كان فاكر ..
وطلع مش فاكر ولا حاجة ..
كان خايب لكن
كان طيب
كان نفسُه يحافظ 
ع الحاجة ..
كان شئ 
وصديق 
وطريق ماشي
والآخر ماوصلش لحاجة ..
كان حاجة ومحتاجة لحاجة ..
كان شايب، خايب
كان طيب
وطلع مش طيب
ولا حاجة ..

9 - تروح تيجي لـ الشاعر نبيل عبد الحميد

تروح تيجي
تجيب وتسيب
يضيع العُمر جُوّة الشيب ..
توصّي الحِلم على بُكرة
يموت بُكرة في علم الغيب ..
وما في الجيب،
تمن آخر رهان يانصيب ..
تراهن ع إللي جَيّ هناك
فتخسر كل حاجة معاك ..
بياض الشَعر مع بُكرة
وجيب فاضي بيترجاك ..
كفاية وسيب
خِسِرت الجَيّ و الرايح 
فـ حاجة مالكش فيها نصيب ..

10 - يسبق كام خطوة لـ الشاعر نبيل عبد الحميد

اللعبة بتبدأ
بيحاول
يتحرك بالسهم يمين ...
يسبق كام خطوة 
يتسابق
يتفاجئ بيهُم لـ إتنين ..
زاحفين جايين ناويين على شر ..
.. 
الحرب أساساً كَر وفَر ..
والدنيا دي حرب وفي الدنيا
تهرب من مُر تلاقي أمَرّ ..
وياريتك حُر ..
..
بينُط لفوق ..
يخبط صندوق ..
ياخُد قوّة
..
شكلك بقى مِدّي على فتوة ..
مع إن أنا عارفك 
واحلفلك
على إنك أبيض من جُوّة ..
تِشبهلُه
لكن مش هوه ..
...
بيعَدّي سلالم
وحواجز 
ويلّم سكور ..
ينزل مواسير 
يطلع في بحور ..
والآخر لمّا يعدّي السور
يوصل للبيت يلقاه فاضي ..
...
واحشاك أوي نَفسك في الماضي؟ 
ماهو شئ عادي
خليها عليك المرّادي
دنا حِملي تقيل ..
...
الليڤل التاني 
بالليل
والليل مواويل ..
وسلاحف جَيّه ف صف طويل
وأخينا عويل ..
ولا حيلتُه سلاح
ولا سيف ولا خيل ..
وسلاحه هناك جُوّة الصندوق
بينُط لفوق
رِجلُه بتفلِت 
وبينزل لكن 
مش واقف ..
العالم بقى كله سلاحف ..
خسران جولة
كسبان جولة
ضيّع بغبائه كذا محاولة ...
...
كان إيه أولى
حُضن المسافات ولّا الوِحدَة ..
جرّبت ف مِيت مليون سِكّة 
ما وصلّتِش فيهم ولا واحدة ..
ضيعت كتير في محاولاتك
مفاضلش باقيلك غير واحدة ..
...
الكُل مركِّز في القعدة
مرحلة الوحش ..
بيعَدّي وحوش
بين نار وجيوش
ويحاول
برضه ما ينجحش ..
بينُط لفوق
يخبط صندوق
يتحرّك
بس ما يفتحش ..
...
ماقتلش الوَحش ..
قوانين اللعبة ماتسمحش
و أداؤه يبان فعلاً أُوڤر ...
كَتَبِتّلُه الدنيا على الشاشة
إعذرني يا ماريو 
جيم أُوڤر ..

ملحوظة : اسامي القصائد الموجودة في المقال مقتبسة من داخل كل قصيدة.

لمتابعة حساب الشاعر نبيل عبد الحميد علي الفيس بوك أضغط هنا

جديد قسم : قصائد بالعامية

تعليقات: 0

إرسال تعليق