السحر الأسود في مبارة كرة قدم بين فريق Bena Tshadi و Basanga في عام 1998

يوم ٢٨ أكتوبر ١٩٩٨ كان يوم غريب أوي في الكونغو الديموقراطية ..

اقرا أيضاً : الشيخ عامر قصة رعب قصيرة

اليوم دا كان في ماتش كرة قدم بين فريقيّ Bena Tshadi وBasanga في مدينة Kasai وكان الماتش ماشي تعادل ١ - ١ والدنيا حلوة لحد ما فجأة عاصفة قامت والسما قلبت والغيوم غطّت الملعب والجوّ برّد وصاعقة نزلت من السما على أرض الملعب ضربت اللّاعبين صعقتهم وقتلتهم في الحال ..
.
لحد دلوقتي الموضوع - نوعًا ما - ممكن يبقى عادي، بس أعتقد مش هيبقى عادي لو عرفت إن الصاعقة دي قتلت شبابا ما بين الـ ٢٠ والـ ٣٥ سنة .. لأ ونقّت اللـ ١١ لاعب بتوع فريق Bena Tshadi بس وقتلتهم في الحال وباقي لاعبي Basanga زي ما هم، مُجرّد حروق بس بدون إصابات خطيرة ..!
.
الغريبة إن لمّا دا حصل محدش استغرب عشان متعوّدين في بلاد وسط وغرب أفريقيا على إستخدام السحر الأسود لإلحاق الأذى بالغير وخصوصًا في الأمور اللّي فيها تنافُس زيّ الرياضة، وبردو من المُعتقَد عندهم إن "الشامان" أو ساحر القبيلة بيقدر يتحكّم في الطقس ويجلب الأمطار والعواصف ودا اللّي قدر يعمله في الفريق المُنافس دا اليوم دا 

اقرا أيضاً : مصحة ويفرلي هيلز النفسية و صور أشباح حقيقية التقطت فيها

أحد التفسيرات اللّي اتقالت ساعتها إن الستارز (الحذاء) بتاع الفريق المُنافس كان فيه أجزاء معدنية في النعول بتاعتهم ودا اللّي ساعد الكهربا تسري في أجسامهم وتصعقهم لوحدهم بعيدًا عن لاعبي الفريق التاني اللّي أحذيتهم مصنوعة من المطّاط فقط واللّي بيبقى عازل طبيعي مبيوصّلش كهربا ..
.
موضوع الصواعق اللّي بتضرب الملاعب دا مش جديد عشان حصل قبل كدة كذة مرة وكان لسّه قبل الحادثة دي، صاعقة تانية ضربت ماتش في دوري جنوب أفريقيا لغت الماتش كلّه بعد ما ٧ لاعبين بالحكم بتاعهم اتحرقوا منها ووقعوا عالأرض ماسكين راسهم رعينبهم وودانهم وبعدها اتنقلوا للمُستشفى ..

اقرا أيضاً :ذبابة deer fly المرعبة

الفكرة بقى إن مكنش في أي تأكيد رسمي من الحكومة ساعتها على اللّي اتقال دا واللّي كان مصدره صحيفة L'Avenir الرسمية في كينشاسا العاصمة، عشان الفترة دي البلد كانت مقسومة بالحرب الأهلية من جهة ومشاكل مع البلاد المجاورة زي رواندا من جهة تانية، فمكنش في حد فاضي يهتم بالرياضة ولا أخبارها ..
بس انت مُتخيّل لو دا فعلًا حصل ..؟ صاعقة موجّهة تنقّي أهدافها ..؟